மோனி

எது நானோ.. அது நானில்லை…

Archive for வாசித்ததில் ரசித்தவைகள்

பைத்தியமாகிறேன்…

முத்தம்

நம்சந்திப்புகளின் பொழுதுகளையெல்லாம்
கைகளுக்குள்
பொத்தி எடுத்துவந்து
என் அறையின் கனத்த மரப்பேழைக்குள்
பத்திரப்படுத்தி கொண்டிருந்தேன்
என்பதை நீயும் அறிவாய்..

நம் முதல் சந்திப்பு முதல்,
நீ காதல் சொன்ன பொழுது முதல்,
ஒரு அடர் மழைநாளில்
நீ முதன்முறையாக
என் கைகளை பிடித்துக்கொண்ட பொழுது முதல்,

பிறிதொரு ஆழ்ந்த பனி இரவின்
தனிமையில்
நான் உன்னை முதன்முறையாக
முத்தமிட்ட பொழுது முதல்,

என்னை மறந்து விடு என்று
நீ சொன்ன அந்த கடைசி சந்திப்பின்
பொழுதுவரை
மிக கவனமாய்
பத்திரப்படுத்தி கொண்டிருந்தேன்..

இன்றைய அடர் மழைநாளின்
இரவு குளிருக்கு
அப்பொழுதுகளை ஒவ்வொன்றாய்
தீயினுள் போட்டு குளிர்காய்ந்து கொண்டிருக்கிறேன்
கழிவிரக்கம் தாளாமல்..

தீயின் வெளிச்சத்தில்
மின்னுகிறது
கையிலிருக்கும் மதுக்குவளை..


அம்மரப்பேழையினுள்
இன்னமும் ஒட்டிக்கொண்டு இருக்கிறது
உன் உண்மையான பிரியங்கள்.

அவற்றை
நான் மிகவும் நேசிக்கிறேன்…

_ நன்றிகள் _
_ கனவில் தொலைதல் _
_ சரவணகுமார் MSK _